Katharina Bošnjak


 

A Glust

Wei es amoi wieda rächd plogd ho, mei Muadda: 
Wos isn des und sel und 's anda 
sie's a ned gwisd hod amendt 
hod's gsagd: A Mehlspeis zom Umhenga! 
Na ho i äpps zom Nochdenga ghatt.
Sie is daweil kemma mim zinkan Eima 
mim Puzhoddan und mim Schrubba 
zom Schdumauspudzn. 
I ho rni vazong aafs Fenstabrell.
Gwischd hod's und griweld und gwischd. 
E da Nahmaschie om is Katz glegn 
's Kopfal is hi und hear ganga 
mim Schrubba mid.
'S Kraiz hod ir weh do, da Muadda
owa Schdumbredda sand wieda schneeweis gwen, 
schneeweis.
Da Disch is wieda fire gruckd worn 
es Herrgodseck 
und mir is's wieda kemma:
A Mehlspeis zom Unihenga!
Obs wos Brons waar? 
Wos Gsons 
oda wos Aussabachas?
Und aus wos de Rearn gwen waarn, zom Umhenga? 
Gor z'gearn hait i äpps sechas ghatt, 
haits umghengd, umanandadrong 
und zledzd gessn.
Owa ogschaud hod's me ghatt, mei Muadda 
wei's des gsagd hod 
dase gwisd ho, eitz dearfe nimma benzn.
Nacha ho i hold weidagmochd mim Nochdenga
bin ned ferde worn
gnoau gnumma bis heit ned.
A gscheide Frau is gwen, mei Muadda.

 

 

 

 

Gsellschafft

Zersd ho i's selwagsaamde Hungateichl aafglegd, 
do ham de Herrschafftn a Weil dro nogn kinna, 
Naha ho i ear, in meim bestn Scherm, 
d' Wossasubbn aafdrogn 
aaf dear weie ned daheargschwumma bi. 
Eitz hams an Bron scho a weng grocha. 
Mei Schweinsbron 
is so apatitle gwen 
wei ausm Buldabeichl, 
weil do ho en a ausgschnin ghatt.
Gor ned noude ho i Kneel austaalt 
vo de oi, wei ma ollaweil 
en Hois steckat bliebn san 
bols gor so gscheid dahear gredt ham. 
Prost Mallzeit!
Unta Gsichda one Foa ho i
Talarl gschom und dazou gsagd: 
Do host dein Solod! 
Aisa Zeigniss, dasa me auskenn e da Welld 
ho i ear no an Pfifkaas voagsedzd.
Mid hoam ho i ear,
sche eibabierld und mid am grean Mascherl, 
a goidas Nixal gem.
Und zledzd mei Haus, mei Tir vaspeadt.